საერთაშორისო მიმოხილვა. 2 აგვისტო 2025 წელი
მსოფლიოში განხორციელდა „ტყვეთა და მძევალთა გაცვლა“ სუფთად ცივი ომის სტილში!
გუშინ გლობალური მედია მთელი დღის განმავლობაში ადევნებდა თვალს, რა ხდებოდა, როგორ ხდებოდა, სად რომელი სამგზავრო თუ სამხედრო-სატრანსპორტო „სპეცბორტი“ მიფრინავდა, ჰაერში როგორ გადაადგილდებოდა, რომელ აეროპორტში რომელი თვითმფრინავი დაჯდა, ვინ რა განაცხადა, ვინ ვის დახვდა და ა.შ და ა.შ.
მოკლედ თუ ვიტყვით, რუსეთმა და ამერიკამ (უფრო ზუსტად დასავლეთმა) რუსულ ჯურღმულებში სრულიად უკანონოდ, შეთითხნილი ბრალდებებით და მარაზმატული განაჩენებით წამებული პოლიტპატიმრები, ასევე ამერიკელი და გერმანელი მძევლები (აი მართლა სასიკვდილო მძევლები) გაცვალეს უპირველეს ყოვლისა პუტინის კილერზე, ვინც ბერლინის ცენტრში მოკლა საქართველოს მოქალაქე, ქისტი ხანგოშვილი, ასევე რამდენიმე რუს დივერსანტზე, ჯაშუშზე და სპეცსამსახურების დავალებით მოქმედ ბობოლა ინტერნეტ-ჰაკერზე.
რასაკვირველია მთავარი როლი შეასრულა პუტინის სურვილმა, „გამოეხსნა“ გერმანიის ციხიდან კილერი „ვადიმ კრასიკოვი“.
ბრჭყალებში რასაკვირველია, რადგან ამ არსებას რამდენიმე სახელი და გვარი ქვეყნდება...... რეალურად ვინ არის ეს კილერი, რა გვარია არავინ იცის.
ცნობილია მხოლოდ, რომ X (ასე მოიხსენიებენ) მკვლელი მსახურობდა რუსულ ელიტურ სამხედრო დაჯგუფებაში Вымпел და მას პუტინმა უწოდა „გმირი“ ხანგოშვილის მკვლელობის შემდეგ.
თან ცინიკურად დაამატა: „ამ პატრიოტმა საკუთარი ინიციატივით მოკლა ის ჩეჩენი ტერორისტი თუ ვინმემ დაავალა, სხვა საკითხიაო“.
„სხვა საკითხია“, პუტინის ენიდან თუ „გადმოვთარგმნით“, ნიშნავს „არა აქვს მნიშვნელობა“.
კიდევ უფრო მეტი: პუტინი პირადად დახვდა მოსკოვის ვნუკოვოს აეროპორტში ამ „გმირ კილერს“ და სხვა „გამოხსნილ“ ჯაშუშებსა თუ ინტერნეტ-დივერსანტებს.
მანამდე პუტინმა გამოსცა რამდენიმე საიდუმლო (!) ბრძანებულება. ამას მისი რეჟიმის ე.წ. „კონსტიტუცია და კანონი“ ითვალისწინებს.
ანუ პუტინმა ერთის მხრივ გამოსცა „საიდუმლო“ ბრძანებულებები რუსულ ციხეებში და კოლონიებში დამწყვდეულ პოლიტპატიმართა და მძევალთა „შეწყალების თაობაზე და მეორეს მხრივ, კილერი X ასევე სხვა რუსი ჯაშუშები და დივერსანტები დააჯილდოვა რუსეთის ფედერაციის ორდენებით.
X-კილერს კი, ზოგიერთი ცნობით, გმირობა მიანიჭა.
ეს უკანასკნელი გერმანიის ციხეში მთელი ამ ხნის განმავლობაში დუმილს ინარჩუნებდა.
აბა რა - შოკოლადი არ აკლდა და.....იცოდა, ადრე თუ გვიან გამოიხსნიდა პუტინი.
სანამ დავასახელებდეთ რას ეხება და ვის ეხება კონკრეტულად, გავიხსენოთ, რომ „ცივი ომის“ დროს დაახლოებით ამ სტილში გაცვალეს ამერიკელი მფრინავი პაუერსი და საბჭოთა სუპერ-აგენტი (გერმანული წარმომავლობის ინგლისელი) აბელი.
ოკუპირებული და ანექსირებული „გერმანიის დემოკრატიული რესპუბლიკისა“ და „გერმანიის ფედერაციული რესპუბლიკის“ საზღვარზე, გლინიკის ხიდზე გაიმართა გაცვლის სპეცოპერაცია მაშინ: ერთის მხრივ მიდიოდა პაუერსი, მეორეს მხრივ მოდიოდა აბელი, ხიდის ცენტრში ერთმანეთს თვალი-თვალში გაუყარეს და მივიდნენ თავისიანებთან.
მაგრამ ის ომი მაინც იყო (თუნდაც „ცივი“), პაუერსი სამხედრო მფრინავი მაინც იყო....მართლა სადაზვერვო ოპერაციას აწარმოებდა სსრკ საჰაერო სივრცეში და ორი მზვერავი გაცვალეს მხარეებმა, ახლა კი.......
მანამდე, 2010 წელს მოსკოვმა და ვაშინგტონმა გაცვალეს რამდენიმე ადამიანი.
რუსებმა გაუშვეს, მათ შორის, სკრიპალი (სწორედ ის სკრიპალი, რომელიც რამდენიმე წლის შემდეგ ინგლისში, სოლსბერიში მოწამლეს საზარელი ნივთიერება „ნოვიჩოკით“) და მიიღეს სხვებთან ერთად აპოკალიფსური მეძავი-ჯაშუში ანნა ჩაპმანი, ვინც ამერიკულ „გერონტოკრატიულ“ ელიტებს, მათ შორის პარტიულ ელიტებს.......ხიბლავდა თავისი სილამაზით, სექსუალობით და მნიშვნელოვან „გავლენის კვანძებსაც“ ქმნიდა ინფორმაციის მოსაპოვებლად თუ კრემლის ინტერესთა ლობირებისთვის.
ძველი КГБ-შნიკი პუტინი იმ დროს (2010წ) მათაც დახვდა აეროპორტში, შემდეგ სადილზე დაპატიჟა და როცა პრეს-კონფერენციაზე კითხეს რაზე ისაუბრეთო, უპასუხა: „უბრალოდ ვიმღერეთ С чего начинается рооооодинаааааа»
საბავშვო/სასკოლო სიმღერაა ასეთი - პატრიოტული.
სხვათა შორის, აქვე უნდა ითქვას, რომ ის გაცვლა მოჰყვა ამერიკაში რუსული ჯაშუშური ქსელის უდიდეს „ჩავარდნას“.
ჩაპმანთან ერთად ათეულობით რუსი ჯაშუში დააპატიმრეს FBI-მ და Secret service- მა მას შემდეგ, რაც რუსული ФСБ-ს გენერალი გაიქცა ამერიაკში და მთელი რუსული აგენტურა „ჩაუშვა“.
საინტერესოა თუ როგორ გაიქცა: ჯერ კიევში ჩავიდა მატარებლით, რაკი მატარებლებს ФСБ ვერ გააკონტროლებდა და კიევიდან გაფრინდა ამერიკაში.
აეროპორტს უკრაინა აკონტროლებდა მაშინაც და არა მოსკოვი.
ერევნის „ზვარტნოცი“ კი არ იყო.
რაც შეეხება ამჟამად განხორციელებულ გაცვლას, რუსული ჯურღმულებიდან გამოიხსნეს პოლიტპატიმარი ვლადიმერ კარა-მურზა, ასევე ილია იაშინი, ანდრეი პივოვაროვი, ვადიმ ოსტანინი, ქსენია ფადეევა, ლილია ჩანიშევა, ოლეგ ორლოვი, ჟურნალისტი (RFERL) ალსუ კურმაშევა და WSJ ჟურნალისტი ევან გერშკოვიჩი, მხატვარი ალექსანდრე სკოჩილენკო, აშშ ყოფილი საზღვაო ფეხოსანი პოლ უილანი, გერმანიის მოქალაქეები რიკი კრეგერი, პატრიკ შებელი, გერმან მოიჯესი, დიტერ ვორონინი და კევინ ლიკი.
ეს გერმანიის მოქალაქეების ამბავი საერთოდ გამაოგნებელია: რაკი გერმანია უარს აცხადებდა შარშან მოლაპარაკების დროს გამოეშვა კილერი X და ვაშინგტონმაც ვერ დაარწმუნა ბერლინი ეს ნაბიჯი გადაედგა, რუსულმა და ბელორუსულმა სპეცსამსახურებმა სრულიად უსაფუძვლოდ, აბსოლუტურად „არაფრისთვის“ მძევლად აიყვანეს რამდენიმე გერმანიის მოქალაქე, რათა ბერლინისთვის „მოტივატორი“ შეექმნათ.
ამგვარ საკითხებში, მათ შორის უკრაინის წინააღმდეგ აგრესიისას, ლუკაშენკო პუტინის ყმაა; თორემ ბელორუსული რძის ნაწარმის რუსულ ბაზრებზე გაყიდვისას და მათში „ჩხირების“ აღმოჩენისას კი შეიძლება მოსკოვი გააკრიტიკოს.
სანაცვლოდ ვინ მიიღო პუტინმა? ხსენებული კილერი X (პირობითი „ვადიმ კრასიკოვი“), ვისაც ბერლინის ტირგარტენში ჩადენილი ცინიკური მკვლელობისთვის სამუდამო პატიმრობა ჰქონდა მისჯილი არა უბრალოდ ტერორიზმის, არამედ სახელმწიფო ტერორიზმის ბრალდებით და რომლის განთავისუფლების გამო გერმანიის პროკურატურამ გერმანიის ფედერალური კანცლერი მწარედ გააკრიტიკა (დიახაც დემოკრატიაა და დემოკრატიაში ასეთი რამ ნორმალურია-დ) არტიომ და ანა დულცევები, რომლებიც სლოვენიაში იხდიდნენ სასჯელს რუსეთის სასარგებლოდ შპიონაჟისთვის; ნორვეგიასა და პოლონეთში შპიონაჟისთვის სასჯელმისჯილი მიხაილ მიკუშინი და პაველ რუბცოვი; ინტერნეტ-დივერსანტი, ჰაკერი რომან სელეზნიოვი ФСБ-ს ოფიცერი ვადიმ კონაშიონოკი, რომელიც აკოორდინირებდა რუსული რეზიდენტურის ძალისხმევას დასავლეთში სასანქციო რეჟიმის დარღვევის თაობაზე; ხაკერი ვლადისლავ კლიუშინი, რომელიც სხვათა შორის იმაშია ბრალდებული, რომ ინტერნეტ-დივერსიებს ახორციელებდა ამერიკული საფონდო ბირჟის დესტაბილიზაციისთვის;
ჟურნალისტური რესურსების ცნობით (ოფიციალური წყაროები არ გასცემდნენ ინფორმაციას, რათა პროცესი არ დაეზიანებინათ) გაცვლა რეალურად შედგა ანკარაში, თურქეთის დედაქალაქში!
ანუ ერდოღანმა რა თქმა უნდა (რატომღაც რომ......) მორიგი „ქულები“ ჩაიწერა ანუ ჟარგონით თუ ვიტყვით „ერთი აქეთ გააგორა კამათელი და მეორე-იქით“....მაშასადამე ორივე მხარისთვის „შეუცვლელი“ შუამავლის როლი ითამაშა.
ანკარადან, განთავისუფლებული პოლიტპატიმრები გაფრინდნენ გერმანულ კიოლნში. „რუსები“ გამოფრინდნენ მოსკოვში, ვნუკოვოს აეროპორტში, სადაც.....არა მხოლოდ პუტინი დახვდათ პირადად, არამედ წითელი ხალიჩა დაუგეს და საპატიო ყარაული (!) ჩაუმწკრივეს, როგორც უმაღლესი რანგის სტუმრებს ხვდებიან ხოლმე.
პუტინს არ დაავიწყდა ანნა დულცოვასთვის ყვავილების თაიგული მიერთმია.
როგორც თავის დროზე უკვე ნახსენებ აპოკალიფსურ მეძავ ანნა ჩაპმანს მიართვა.
«Ездила по Вашингтону без трусов» - როგორც დაწერა მაშინ იულია ლატინინამ.
გულდასაწყვეტია, რომ ამ გრანდიოზულ „გაცვლაში“ მონაწილეობა უნდა მიეღო ალექსეი ნავალნის, თუმცა ვერ მოასწრეს......
ეს ინფორმაცია დაადასტურა აშშ პრეზიდენტის მრჩეველმა ეროვნული უსაფრთხოების საკითხებში, ჯეკ სალივანმა. მისი თქმით, მთელი 2023 წლის განმავლობაში მიმდინარეობა მოლაპარაკება მოსკოვთან, თუმცა..... მიზეზი არ უთქვამს, თუ რატომ ვერ მოესწრო გაცვლა ნავალნის სიკვდილამდე, მაგრამ რეალური მიზეზი ჟურნალისტურ წრეებში ზუსტად იციან: ბერლინი გაჯიუტდა!
ერთის მხრივ, „გაცვლა“ თუ მოხდებოდა, უნდა ყოფილიყო სწორედ ასეთი პრინციპით: „ყველა-ყველაზე“ ანუ პუტინს ნავალნის ტოლფასად მიაჩნდა მხოლოდ კილერი X სხვა არავინ, მაგრამ...... გერმანიის Deep state კატეგორიული წინააღმდეგი იყო, რაც უკვე გაცვლის შემდეგ გამჟღავნდა გერმანიის პროკურატურის კრიტიკაში კანცლერის და მთლიანად მთავრობის მიმართ;
ამიტომ რუსებმა და ბელორუსებმა „მოტივატორი“ შეუქმნეს გერმანიას და რამდენიმე გერმანიის მოქალაქე(ც) დაიჭირეს სრულიად ფეიკური და შეთითხნილი ბრადებებით.
კანცლერ შოლცის გუშინდელი გამოსვლა თავის მართლებას უფრო ჰგავდა: „ნავალნის სიკვდილის შემდეგ გავაცნობიერეთ, რომ პოლიტპატიმრების სიცოცხლეს საფრთხე ემუქრებოდა და სხვაგვარად ვერ მოვიქცეოდითო“ - თქვა კანცლერმა.
რუსეთის უშიშროების საბჭოს თავმჯდომარის მოადგილემ (თავმჯდომარე თვითონ პუტინია) ექს-პრეზიდენტმა დიმიტრი მედვედევმა კი გუშინვე დაწერა განთავისუფლებულ პოლიტპატიმრებზე: „დაიმალეთ ახლა, „მოწმეების“ დაცვის ამერიკული პროგრამებით ისარგებლეთ თქვე მოღალატეებო; სულ ერთია ადრე თუ გვიან გიპოვით და ჩაგაძაღლებთ, თუმცა მე ვარჩევდი, ციხეში ჩამპალიყავით და იქვე ჩაძაღლებულიყავითო“ (იგულისხმება: „როგორც ნავალნი“-დ)-წერს რუსეთის ყოფილი პრეზიდენტი, რომელსაც 2009 წელს დასავლეთის ლიდერები „მეგობარს“ უწოდებდნენ და წითელ მოედანზე, 9 მაისის აღლუმისას მხარს უმშვენებდნენ სამხედრო ქვედანაყოფთა მარშირებასთან ერთად.
